LinkedinGoogle+YouTubeFacebookTwitter

Gymraeg

View the Welsh employability skills in English
Gweld sgiliau cyflogadwyedd ar gyfer Cymraeg

Mae'r wybodaeth isod hefyd ar gael yn Saesneg

Yn nodweddiadol bydd gan berson sydd wedi graddio yn y Gymraeg y gallu i:

  • ddefnyddio'r Gymraeg i drafod pynciau cymhleth mewn ffordd gywrain, ar lafar ac yn ysgrifenedig
  • casglu a chyfleu gwybodaeth am destunau llenyddol a'u trafod yn feirniadol
  • ymateb yn briodol i'r defnydd o iaith a dychymyg mewn llenyddiaeth
  • ystyried llenyddiaeth yn ei chyd-destun hanesyddol, cymdeithasol a deallusol
  • deall deunydd a gynhyrchir mewn iaith arall neu ieithoedd eraill a'i atgynhyrchu yn y Gymraeg mewn modd sy'n gyson â nodweddion yr iaith
  • defnyddio sgiliau sy'n briodol i'r ddisgyblaeth, fel cynhyrchu llyfryddiaeth a chyfeirio at ffynonellau mewn dull cyson a safonol
  • meddwl drostynt eu hunain ac ymateb yn feirniadol, gan ddadansoddi a chrynhoi safbwyntiau a barn eraill
  • gweithio'n annibynnol mewn modd manwl a thrylwyr
  • casglu gwybodaeth mewn ffordd drefnus a phwrpasol o amryw ffynhonnell, ei gwerthuso'n feirniadol a'i chyflwyno mewn ffordd ddealladwy ac ystyrlon
  • deall a datblygu cysyniadau cymhleth a'u trin yn feirniadol ac yn ddadansoddol
  • gweithio fel rhan o dîm
  • dangos sgiliau trefniadaethol wrth drafod tasgau a osodwyd, gan gynnwys rheoli amser
  • defnyddio sgiliau technegol gwybodaeth.

Mae'r Gymraeg yn ddisgyblaeth academaidd eang ac amrywiol o ofynion sy'n golygu creu, cyflwyno a dehongli testunau ysgrifenedig ac ar lafar, ynghyd â natur a hanes yr iaith a'r cyfleoedd sy'n agored iddi yn y byd sydd ohoni. Mae astudio'r Gymraeg yn meithrin agwedd meddwl-agored a hyblyg a'r gallu i werthuso gwahanol gysyniadau a'u cyflwyno gan ddefnyddio iaith lafar ac ysgrifenedig briodol; mae'n galluogi myfyrwyr i drafod a dehongli diwylliannau a gwerthoedd y gorffennol, ynghyd â datblygiadau cyfoes yn y byd modern.

Mae'r Gymraeg yn agored i ddylanwadau byd rhyngwladol cyfoes y mae Cymru'n rhan ohono. Mae agwedd y rhai sy'n siarad Cymraeg yn debyg i rai trigolion y byd gorllewinol yn gyffredinol ac mae'r dulliau o ysgrifennu llenyddiaeth ac o gyfathrebu yn y Gymraeg yn fwy amrywiol yn awr nag y buont erioed. Mae'r iaith yn wynebu newidiadau sylweddol sy'n gosod cyfrifoldeb penodol ar y rhai hynny sy'n ymwneud â'r pwnc i ddiogelu ei sail a'i phriodoleddau wrth iddi ddatblygu ac wrth i'r ystod o gyfleoedd a'r dulliau newydd o ddefnyddio'r Gymraeg gyflwyno eu hunain.

Calon y pwnc yw'r Gymraeg, ei natur, ei hanes a'i sefyllfa bresennol, a llenyddiaeth Gymraeg ym mhob cyfnod. Gall astudiaethau llenyddol gynnwys drama, ffilm, chwedlau ac ysgrifennu creadigol. Nodweddir y Gymraeg gan ei hanes maith a chryfder ei thraddodiad llenyddol ers y Canol Oesoedd. Mae rhai cyrsiau gradd yn cynnig y cyfle i astudio cyfnodau penodol, neu fathau o lenyddiaeth, neu agweddau ar iaith yn fanwl.

Gall gradd yn y Gymraeg gynnwys astudio un neu fwy o'r ieithoedd Celtaidd eraill a'u llenyddiaeth, gwaith mewn ieithoedd eraill a sefyllfaoedd amlieithog tebyg. Gellir cynnwys disgyblaethau academaidd eraill gan gynnwys theori llenyddiaeth, ieithyddiaeth, ieithoedd modern, Saesneg, astudiaethau clasurol, hanes, gwleidyddiaeth a chymdeithaseg. Mae rhai myfyriwr yn cyfuno'r Gymraeg gyda'r pynciau hyn, ac mae yna nifer o gyfleoedd ar gael ar gyfer astudiaethau rhyngddisgyblaethol a chymharol.

Gyda chynnydd yn y galw am wybodaeth o'r Gymraeg mewn nifer o feysydd, yn enwedig addysg, y cyfryngau, llywodraeth leol a'r sector cyhoeddus, mae'r radd yn gymhwyster gwerthfawr ar gyfer swyddi sy'n gofyn am bersonél dwyieithog ac mae graddedigion yn y Gymraeg yn dilyn amrywiaeth o yrfaoedd. Yn dilyn y Ddeddf Iaith (1993), cynyddodd y galw yn fawr am weinyddwyr dwyieithog mewn llywodraeth leol, y gwasanaeth iechyd, awdurdodau heddlu a masnach yn gyffredin. Cyflogir nifer o raddedigion yng Nghynulliad Cenedlaethol Cymru mewn amryw o swyddi.

Gellir dod o hyd i ddeunydd ychwanegol gan gynnwys y map Sgiliau a Phriodoleddau ar gyfer y ddisgyblaeth yn www.llas.ac.uk/index.aspx. Gan fod Canolfannau Pwnc wedi, ac yn parhau i ddatblygu amrywiaeth o adnoddau i gefnogi'r defnydd o'r Proffiliau a chyflogadwyedd, mae'n bwysig gwirio gwefan y Ganolfan am y wybodaeth fwyaf cynhwysfawr a'r datblygiadau diweddaraf.

Seiliwyd y Proffil Disgyblaeth (2006) hwn ar faincnod yr Asiantaeth Sicrhau Ansawdd yn www.qaa.ac.uk/academicinfrastructure/benchmark/honours/default.asp.


> back to subject profiles